唔少人都會用打扮風格、著咩牌子嘅衫、用咩型號嘅電話等等，去評價另一個人嘅為人，咁當然你揸咩牌子嘅車，亦可以係其他人評價你嘅基準之一。而近日英國劏車網「Scrap Car Comparison」就公佈咗個研究，搵出男士揸咩牌子嘅車、揸車時嘅乜嘢行為，係會令女性覺得佢更加吸引或反感，結果BMW就成「最令人反感」嘅汽車品牌！我重伸一次，係個研究咁講架下，唔係我呀！

圖片：《F9》via IMDB

「Scrap Car Comparison」指佢哋訪問咗2,000個人，結果發現有8%受訪者認為BMW車主都係「危險及侵略性」嘅駕駛者，所以如果發現對方揸BMW就會令其吸引度大減；緊隨其後嘅係Fiat及Skoda (但無提供理由)，再之後就係Audi。而喺「最吸引嘅汽車品牌」中，Mercedes-Benz就以14%打敗Porsche及Lamborghini居首。

圖片：《Baby Driver》

除咗汽車品牌，調查亦有詢問駕駛行為對於吸引度嘅影響。其中就發現有15%人認為如果駕駛者用「閃頭燈」嘅方式，對其他駕駛表示感謝，會被視為有禮貌所以更加吸引；另一邊廂，飲完酒之後揸車就以45%成為「最令人反感」嘅駕駛行為，緊隨其後嘅係危險駕駛 (42%) 以及一邊揸車一邊玩電話 (38%)，可見大家都非常注重安全。

另外有11%受訪者認為揸電動車嘅人更加吸引，而且「按照道路限速駕駛」、「揸自動波車」等都被視為令駕駛者更吸引嘅行為。